الأمان المادي

حاجة الإنسان بتفجر فيه طاقات وحماسة ما يعهدهاش في نفسه في الأوقات العادية ، تفكيره بيخلق مية طريق وطريق عشان يقربه من نقطة الهدف او انه يتجاوز ويحل المشكلة ، الإنسان ما يقدرش يقعد تحت ضغط وتوتر عصبي كبير عليه لفترة كبيرة لأنه بيبدأ ينهار تدريجيا لحد ما تنفذ قواه ويستسلم في الآخر ، وده بيخليه عاجز سواء معنويا او جسديا او الاتنين .

هي قالتلي ياريت انا اقدر اشتغل دلوقتي عشان يبقى معايا فلوس اقدر اصرف على نفسي واحل جزء من المشكلة ، شوية ولقيتها مبتسمة جدا وبتقولي على فكرة انا ممكن اشتغل مُدرسة وادي دروس لولاد الشارع ، وقعدت تحسب تمن الحصة والفلوس اللي هتجمعها في الاخر ، كانت مبسوطة جدا انها عرفت تلاقي لنفسها مخرج يخرجها من الضيقة و لو حد سمحلها تعمل كده هيبقى حققت لنفسها اللي هي عايزاه ، الموضوع مش عشان هي مش لاقية فلوس الموضوع عشان تنتصر لكرامتها ومتحسش انها تحت رحمة حد وان حد ممكن يتحكم في حياتها وارادتها كونه بيصرف عليها حتى لو كان الحد ده اللي هو فعلا يملك الحق قدام كل الناس انه يتحكم فيها !

جزء كبير عشان نحس بالأمان مرتبط بالأمان المادي ، انك تحقق لنفسك حياة كريمة مش مرتبطة بتبعية لحد عشان تبقى مستقل و ده مرتبط بأمانك النفسي في تواجدك مع الناس ، ان علاقاتك بيهم تبقى علاقات انسانية خالصة بعيدة عن الاستغلال والقهر وقبضة اليد العليا على اليد السفلى .
أمانك المادي بيحصن اختياراتك الشخصية وبيكسبها قيمتها واحقيتها ، أمانك المادي بيخلي جزء من اختياراتك خالص تماما لما تنحي الجزء المادي على جنب ..

وده واحد من الأساسيات اللي عايزة ابدأ عليها حياتي المستقبلية إن شاء الله وهو الاستقلال المادي ، اني اقدر اكيف واكفي نفسي باللي انا اقدر انجزه من شغلي ، ومع الوقت اتوسع حتى لو كان ببطء ، اني يكون ليّا ذمة مالية منفصلة وما امدش ايدي لحد ، ممكن الموضوع ده ليه اعتبارات نفسية ليها جذور ، بس برضه الواقع اللي بنعيشه والغربة اللي كل واحد عايش فيها ، واحتمالية فقدانك الأمان بفقدانك اللي حواليك بقى احتمالية كبيرة وقريبة كل ده بيخلق جواك احساس انك عايز تكون انت امان نفسك