لو حد سألنا يعني ايه فيسبوك اكيد هنرد عليه موقع اجتماعي بنتعرف فيه ع بعض وبنلاقي فيه بعض وحاجات تانية كده لما تدخل عليه هتعرف.
دايماً ببقى قاعدة ع الكمبيوتر وفاتحة الفيسبوك وحواليا العيلة الكريمة وهم في وادي وانا اكيد في وادي تاني خالص ، فجأة يلاقوا ضحكة كده تعليق كده الاقي كله بصلي باستغراب ع اساس اني اتجنيت او الاقي حد من اخواتي الطعمين يجي يشوف ايه اللي بيضحكني اوي كده. اقولهم صدقوني انا قاعدة معاكم شكلاً بس بس الشاشة اللي قدامي دي عالم تاني خالص في جوا حاجات كتير " احساس بانفصال عن العالم الخارجي 100%" .
بس المصيبة ان ده فعلاً صحيح. الفيسبوك بقى يستهلك حياتنا الطبيعية، بقى يستهلك انفعالتنا، مشاعرنا، حتى حياتنا الشخصية بقت كل حاجة محل تقييم ومشاركة صعبانية لايكية كومنتية !
الفيسبوك الكلام فيه معلهوش جمرك قول و عبر وعيش طالما انت داخل نفسك المصغرة " البروفايل بتاعك "
باتخيل كده لو حد نزل الصبح وكاتب ع وشه الاستاتس بتاعته يا ترى هياخد كام لايك و كام كومنت؟! :D
لو كل واحد قال الكومنت بتاعه وقتي في موقف حصله بحق وحقيق وما استناش لحد ما يروح البيت عشان يدخل الفيسبوك ويكتب عن الموقف ويبدأ يتناقش ويتحاور ويحلل،، ايه اللي هيحصل ؟! هيعبر بحرية اوي زي الفيس وهينتقد بحرية ولا هتبقى لافتة مختصرة في سياق الحدث الطبيعي من غير اضافات وتضخمات او ممكن ما نعلقش ع الموقف من اصله ونكبر دماغنا!
ع الفيس لو قلت رأيك هتلاقي اللي يوافقك و يعارضك عادي يعني بس كمان انت ممكن ما تستحملش حد كتير او تقفش جامد وتلاقي نفسك بتعمل ريموف او حتى بلوك وخلصت الليلة بس اكيد احنا في الواقع ما بنعملش كده لأن علاقتنا بتتسم بالعمق و انها طويلة الاجل مش هشة زي الصداقات الفيسبوكية المؤقتة.
في الطبيعي زي ما اخدنا ان لايك معناها " اعجبني " بس ع الفيسبوك معناها
- اعجبني.
- مجاملة.
- مكسل اقرأها فلايك هتقضي الغرض.
- ممكن تكون بالنسبالنا اكتر من اعجبني بس مش قادر اعلق عشان اتجنب سيل من الحوارات او التحليلات السيكوباتية لشخصيتي المعقدة المتعفنة او اتجنب الالش المصاحب بعلامات كــ :D ,, :P ,, :)) ,, او لو مسخسخ خالص بقى يبقى =))
الفيسبوك ده احنا بس من" جوا اوي " بيبين ازاي بنفكر، بيعبر عن حالتنا ايه بالظبط، ذوقنا الخاص كل واحد بيبرز فيه استايله المختلف و الحاجة اللي بتميزه عن التانيين يمكن دي ميزة ليه لأن الحياة الخارجية للأسف ما بتدناش فرصة اننا نظهر نفسنا او نعبر عنها بالشكل الكافي او نلاقي نفسنا في الحاجات اللي بنحبها او توفر لنا اهتمامتنا
بس ياريت بتفضل كده وبتخلينا احنا المتفردين لأ ده بيعملنا عملية برمجة بقينا كوبي وبيست للحاجات اللي بتعجبنا او اللي تفكيره مجعلص حبتين نحسه بيقول كلام مثقف مستعصي الفهم يبقى اكيد فاهم اكتر مننا وكلامه ده هيخلينا ننط فوق تفكيرنا سلمتين او تلاتة !
ساعات بتوصل لأحساس داخلي بالتنافس و اثبات الجدارة و اكيد الفاصل كام لايك و كام كومنت !
بحس اني في عالم وهمي استهلكت فيه حاجات كتير مش بس وقتي لأ و جهدي و عقلي و تركيزي ع حساب اولويات تانية وحاجات المفروض انها تتعمل الاول بس بأجلها وببرر لنفسي " اصل ساعة الحظ ما تتعوضش "
الفيسبوك رغم اني ليا فيه صولات و جولات و ممكن اكون حققت الرقم القياسي في استخدامه وخاصة فترة الامتحانات :D بس انا عملت بيه حاجات كويسة يعني
عرفت عليه اصحاب كتير خاصة من الكلية ودي الميزة فعرفتهم في الحقيقة وبقينا اصحاب برا الفيسبوك وجمعتنا اهتمامات و حوارات مشتركة
استفدت منه مش بس بفرغ نفسي فيه لأ كمان مكان للبحث وبدل ما بدور ع حاجة واحدة او بتابع حاجة واحدة بقوا اتنين وتلاتة والخ
بس بردو مازال عالم افتراضي بردود افعال مدروسة مع تلاعب في الحالة المزاجية يؤدي الى مزيد من الاستهلاك في الافعال البشرية
من الأخر كده ما فيهوش تلقائية وواقعية الحدث و الفعل ورد الفعل و التفاعل بالصوت و الصورة و الحركة ;):D