في الإعتقاد ان اللي بيحكي بيخرج اللي جواه فبيشيل الحمل من عليه شوية ويستريح حتى لو راحة مؤقتة ، أنا جربت الحكاية دي اكتر من مرة وكل مرة بتعب بعدها وبتعب أوي ، لقيت ان كل ردود فعلي تجاه أي حدث مهما كان شديد أو بسيط بيبقى "التخزين" بحتفظ بيه في ذاكرة ارشيفية ، واتجاهله لفترة سواء كانت كبيرة أو صغيرة لحد فجأة ألاقيه ظهر على السطح وابدأ احسه بألمه الأول كأنه لسه بيحصل دلوقتي. ساعات الألم ده بيمنعني عن نشاطي اليومي لدرجة اني حتى ما بقدرش اقوم من السرير وانام لفترات طويلة ويبقى عندي كسل ، أو لو اضطريت اني امارس نشاطي عادي الحزن بيبقى هيموتني بحس ان جسمي بيتآكل وإني عندي غصة ووجع في قلبي بيأن كل شوية .
في كام خبطة وراء بعض حصلوا حسيت ان عندهم نهاية المطاف وشدتهم رعبتني واتصرفت بمنطلق الرعب ده ، ساعتها كنت محتاجة ايد تتمد لي تستحملني شوية ، تطبطب عليّا وتقويني .
ساعات الكلام اللي بيقولك اتماسك وكله يقوي من عزمك عشان تكمل بيبقى مش محله خاصة لما انت تبقى فاهم كده كويس وبتتعامل مع اللي محتاج قوتك دي واهتمامك بالشكل ده فعلا وما بتينش ليه خوفك بالعكس بتعامله بمنتهى الصبر والحكمة والقوة اللي بيلمسها عندك ، بس انت كشخص فعلا بتبقى محتاج سند حد يحسسك انه قريب فعلا وحاسس بيك وهيقف جنبك لو لقى رجلك ذلت او خوفك خانك ، يتفهمك للآخر وما يعلقش حتى لو انت افورت حبتين وهولت الأمور !
الناس اللي متعودة عليك ثابت وقوي طول الوقت عايزاك كده يمكن عشان بتستمد قوتها منك فمبتحبش تشوفك بتتضعف .
وممكن اظهارك القوة دي طول الوقت هو ناتج احساس شخصي نابع منك انك مش عايز تبقى مرثية ومثير للشفقة او حد يمدلك ايده بدافع العطف ، طلب مقرف !
الفترة دي معدلاتي الدراسية تحت الأرض ، عمري ما كنت مستسلمة بالشكل ده ، ما بدخلش الإمتحان من اصله وما بقاش عندي القدرة خلاص اني افضل اكرر نفس التمثيلية ونفس الخوف والقلق والتوتر ، مابقاش عندي طاقة ع المواجهة عايزة اهرب من كل حاجة يمكن استريح شوية ، يمكن افرغ اللي جوايا دفعة واحدة وابدأ من جديد ، أو ع الأقل استعيد صلابتي واتزاني ، مش عايزة كلمة توبيخ أو تأنيب كفاية عليّا ضميري اللي معذبني طول الوقت بسبب استسلامي ، طب فيها ايه لما انكسر شوية ، هو اللي انا فيه ده ما يستحقش الإنكسار ؟!
لما حياتك كلها تنتهي قبل ما تبدأ وكل اللي فيها عبارة عن " وصمة " انت مطالب انك تتحمل نتيجة اخطاء ما عملتهاش ، حتى لما يجي الوقت اللي هيبقى مطالب منك تحكي حكايتك لازم توضح انك مظلوم عشان تتصدق !! وانت عارف ان عمرك ما هتعمل كده ولا عمرك هتستجدي الشفقة لأي سبب من الأسباب !
كمان اللي يزود عليك انك تلاقي اللي بيهتم بيك ، بيهتم بناء ع حجم المصاب عندك ، بيزايد ع وجعك ، ايوة ده تستحق اني اهتم بيك عشانه ، ايوة وده كمان فعلا انا بلتمسلك العذر بسببه ، أما ده بقى لأ دي حجة واهية اسباب غير مقنعة.
بيبقى كل اللي في بالك ساعتها وانت مال أهلك اصلا باللي عندي وانت مين عشان تقرر انه يستحق او ما يستحقش ؟!
اتفضل حضرتك عيش حياتي وعيش بشخصيتي وشوف اذا كان امر مهم ولا لأ !!
كل واحد فيه اللي مكفيه يبقى نسكت وخلاص مش مطلوب ازيد من كده ، انهم يساعدوك بفترة صمت ،
"صمـــــــــــــــــــــــــــــت " لكن اكتر تعذيب فعلا ممكن تتعرضله لما انت تبقى عايز تسكت وتلاقي اللي عايز يهون عليك بالدوشة والكلام الكلام الكلام وحكايات من الشرق والغرب حتى و إن كانت معقولة بس كل اللي انت بتتصوره قدامك ان ده اسخف شخصية على وجه الأرض ، ممكن تبطل سخافة بقى وتخليني استمتع ببعض " الهدوء "
ايوة انا عندي حكاية احكيها ، وايوة حكاية حزينة ، لكن عشان الناس معادن ، فمحدش هيقدر حزنك إلا اللي يستاهلك ، ساعتها ده اللي انت كمان هتقدره وتحكيله حكايتك الحزينة وانت فرحان :)