اللحظة اللي تكتشف فيها ان كل حاجة غلط
انك بتدور في المكان الغلط
انك بتحلم تكون مع الناس الغلط
انك بتضيع وقت كبير اوي ما بتعملش حاجة صح
ولا حاجة غلط
بتتفرج على حياتك بتمشي بيك
وانت رهن الانتظار
عشان تعيش الحياة اللي انت عايزها
عايز القرارات اللي في دماغك بس هي اللي تتحقق
غير كده لأ
بتقاوح اوي وبتتمسك اوي باللي انت لقيته
بس القلم الكبير بقى ان اللي انت لقيته ده
هو اللي يسيبك
عادي جداااا
ساعتها فعلا بتقدر انك كنت فعلا غلط
وتسلم للأمر الواقع ، يأخدك معاه
تحس ان الدنيا بتأدبك عشان توافق ع قرارتها هي وبس
وعن اقتناع منك كمان ورضا
انسى بقى ايام زمان والاحلام المزهزهة دي
المشكلة مش ان اختياراتها وحشة
بالعكس هي ممكن تكون المناسبة ليك اوي
بس انت كارهها عشان انت ما اختارتهاش
انت مجبر عليها
اعمل اللي انت عايزه واللي يرضيك انت
وفرح نفسك بنفسك
ما تدروش ع اللي يهتم بيك
الناس ما بتقربش من الضعفاء وما بترثيش حالهم
الناس بتقرب منك لما تحس ان فيك حاجة مميزة
لما تحس انك فعلا قوي وقادر تتحكم في حياتك بالشكل المظبوط
الناس كمان محتاجة حد تتعكز عليه ويواسيها
مش ناقصاك تزود حملها
الناس محتاجة تلمح حلم في عينك
او نوع من الغموض ما يقدروش يفسروه
يضيفولك احترام زيادة
مش عشان انت غامض
انت عادي جدا
بس ساكت
مليون تفسير هتلاقيه ليك
الاجلال و المهابة
او الصمت مداري شخصية ضعيفة
او وراه سر
ما تفرحش اوي لو الناس قالت عنك انك وراك سر
دايما الاسرار بالنسبة للناس حاجة مشينة
او انك طالع فيها اوي ومش عارفين ع ايه
ما انت عادي زيهم اهوه
من غير رغي كتير
" من يعتمد على الآخرين في رفع معناوياته يفقد نفسه حين يفقدهم "
واسيني الاعرج